Impresoras en 3D

Parece que foi onte cando comezaron a xurdir as eficientes e vistosas impresoras en cor, revolucionando os nosos traballos, documentos, apuntes... dádonlles unha nova apariencia. Pois unha nova revolución está a impoñerse no mundo do deseño industrial, as impresoras en tres dimensións. Esta técnica coñécese co nome de estereolitografía.

De qué estamos a falar? 

Ben, estamos a falar de máquinas que, conectadas a un programa de CAD, introducen os datos do deseño e, capa a capa, empregando diferentes métodos, elaboran unha maqueta do noso proxecto. Algunhas incluso inclúen cartuchos de tinta para deixar a maqueta completamente coloreada e detallada.

O proceso destaca pola súa sinxeleza. En primeiro lugar deseñamos o obxecto mediante un programa de deseño asistido por ordenador (CAD). Unha vez rematado, conectámolo á impresora. O resto é todo automático, a máquina encárgase de analizar o deseño, dividilo en capas e reproducilo. Normalmente os modelos saen listos e rematados. Existen varias técnicas, inxección de plástico, polímeros fotosensibles que se endurecen mediante laser, LOM (capa a capa sobre metal)...

A súa demanda aumenta, o seu prezo baixa, facendoas adsequibles para  empresas de tamaño medio, onde se produzan varios prototipos ao ano. Inda así, seu prezo non baixa dos 15.000 euros, e a reposición do material tampouco resulta económica. Isto provocou a aparición de empresas adicadas a imprimir  os deseños dos demais. Calquera persoa que teña unha idea innovadora, unha mellora dalgún produto, ou, simplemente un deseño propio co que desexe adornar a súa casa, pode acudir a algunha destas empresas e obter a súa maqueta por un prezo máis que aceptable.

Un dos métodos máis vistosos é o que emprega un polímero fotosensible que se endurece cando incide unha luz laser sobre el. A impresora vai poñendo capa tras capa de polímero en po, endurecendo só a parte que se corresponde co modelo, para, ao final, ter o modelo sumerxido no resto do polímero. O po restante é perfectamente aproveitable para un próximo modelo, co cal non se desperdicia. Ímolo ver moito máis claro no seguinte vídeo:

Outro método consiste en extruír lámina a lámina o material, como se fose  unha manga pasteleira. O resultado é espectacular, como podemos ver no seguinte vídeo a cámara rápida:

Esto non é todo, podemos atopar máquinas que realizan os nosos modelos en aceiro inoxidable ou noutros metais, obtendo obxectos moito máis resistentes e durareiros. Podemos facer que nos impriman e nos manden o noso propio deseño na empresa Shapeways.